ජාත්‍යන්තර මූල්‍ය අරමුදල ශ්‍රී ලංකාව සමඟ වන විස්තීර්ණ ණය පහසුකමෙහි හත්වන සමාලෝචනයට අදාළව කාර්ය මණ්ඩල මට්ටමේ එකගතාවකට එළඹීම පසුගිය ඔක්තෝබර් 04 දින සිදුවිය.
එහිදී මූල්‍ය අරමුදල වැඩිදුරටත් කියා සිටියේ, ජාත්‍යන්තර මූල්‍ය අරමුදලේ විධායක මණ්ඩලය විසින් මෙම සමාලෝචනය අනුමත කිරීමෙන් පසු, ශ්‍රී ලංකාවට එක්සත් ජනපද ඩොලර් මිලියන 345ක පමණ මූල්‍යන පහසුකමක් සඳහා ප්‍රවේශය හිමිවනු ඇති බවයි.
කෙසේවෙතත් මෙම කාර්ය මණ්ඩල මට්ටමේ එකඟතාව සඳහා ජාත්‍යන්තර මූල්‍ය අරමුදලේ විධායක මණ්ඩලයේ අනුමැතිය හිමි වීමට නම් ශ්‍රී ලංකාවට කරුණු දෙකක් සපුරාලීමට සිදුවනු ඇත.
එනම්,
- මුදල් අමාත්‍යවරයා විසින් විස්තීර්ණ ණය පහසුකමෙහි පරාමිතීන්ට අනුකූලව 2027 අයවැය පාර්ලිමේන්තුවට ඉදිරිපත් කිරීම.
- බහුපාර්ශවික හවුල්කරුවන්ගේ මූල්‍ය දායකත්වය තහවුරු කිරීම සඳහා මූල්‍යන සහතික සමාලෝචනය සම්පූර්ණ කිරීම සහ ණය ප්‍රතිව්‍යූහගතකරණයේ ප්‍රමාණවත් ප්‍රගතිය තක්සේරු කිරීම.
ඒ අනුව, ජාත්‍යන්තර මූල්‍ය අරමුදල සමඟ වැඩසටහනේ හත්වන සමාලෝචනයට විධායක අනුමැතිය ලැබීම සඳහා හෙට (12) ඉදිරිපත් කිරීමට නියමිත අයවැය, ජාත්‍යන්තර මූල්‍ය අරමුදලේ විස්තීරණ ණය පහසුකමෙහි පරාමිතීන්ට අනුකූල වීම තීරණාත්මක කාරණයක් වනු ඇත.
මේ සම්බන්ධයෙන් අදහස් දක්වමින්, පසුගිය ඔක්තෝබර් 05 වනදා කම්කරු අමාත්‍ය සහ මුදල් හා ක්‍රමසම්පාදන නියෝජ්‍ය අමාත්‍ය ආචාර්ය අනිල් ජයන්ත මහතා සඳහන් කළේ, ජාත්‍යන්තර මූල්‍ය අරමුදලේ විධායක සභාව විසින් අවධානයට ලක්කරනු ලබන කරුණු වන 2027 වසරේ අයවැය ඉදිරිපත් කිරීමට අදාළ කටයුතු, ලෝක බැංකුව සහ ආසියානු සංවර්ධන බැංකුව ඇතුළු බහුපාර්ශ්වීය ආයතන මගින් රටේ විදෙස් සංචිත ඉහළ නංවා ගැනීමට අදාළ අරමුදල් සම්පාදන කටයුතු සහ ණය ප්‍රතිව්‍යුහගතකරණ කටයුතු සාර්ථකව සිදුවෙමින් පවතින නිසා 7 වන සමාලෝචනය සඳහා විධායක සභාවේ අනුමැතිය නිසැක වශයෙන්ම ලැබෙනු ඇති බවයි.